تەندروستیی سلێمانی رایگەیاند، ساڵی رابردوو زیاتر لە 202 هەزار منداڵ لە نەخۆشخانەی د. جەمال رەشیدی منداڵانی فێرکاری چارەسەرکراون.
بەڕێوەبەرایەتیی گشتیی تەندروستیی سلێمانی، رایگەیاند، ساڵی رابردوو 202 هەزار و 609 منداڵ لە بەشی راوێژکاریی نەخۆشخانەی د. جەمال ئەحمەد رەشیدی منداڵانی فێرکاری بینراون. روونیشیکردەوە، لەو ژمارەیە 27 هەزار و 385 منداڵی نەخۆش داخڵکراون و چارەسەری پێویستیان بۆ کراوە.
لە ئامارەکەی تەندروستیی سلێمانییدا ئەوەش هاتووە، ساڵی رابردوو لە نەخۆشخانەی منداڵان 10 هەزار و 500 حاڵەتی سکچوون و رشانەوە و وشکبوونەوە، هەروەها 5 هەزار و 795 حاڵەتی هەناسە توندی تۆمارکراوە. هەروەها 4 هەزار و 262 منداڵ لە بەشی مێشک و دەمار، 2 هەزار و 201 منداڵ لە بەشی چارەسەری خۆراک و هەزار و 719 منداڵ لە بەشی بەدخۆراک و هەزار و 271 منداڵ لە بەشی هەرس و جگەر بیندراون و چارەسەرکراون.
هاوكات ساڵی رابردوو لە نەخۆشخانەی د. جەمال ئەحمەد رەشیدی منداڵانی فێركاری 2,148 منداڵ لە بەشی نەبەكام داخڵكراون و 6,137 تیشك و 5,063 سۆنار و 1,296 ئیكۆ كراوە و 214,834 پشكنینی تاقیگەیی جۆراوجۆر ئەنجامدراوە.